[媒體報導] Premium Position : Beer Pong電子化 Sell酒吧客

Beer Pong是一個有六十多年歷史的枱上遊戲,在香港最常出現於酒吧中,做 IT出身的 Steven與友人說起將 Beer Pong電子化的念頭,繼而在 15年成立公司開發 PONGConnect系統,推出遊戲枱及電子計分系統,將 Beer Pong推向電子遊戲世界,不但得到玩家的歡迎,更吸引到各國的酒吧及 Beer Pong組織使用,將 PONGConnect推向世界。

走進位於銅鑼灣 Zing!內的酒吧 Pong,場內特別之處是有最新的 PONGConnect遊戲系統,作為 PONGConnect CEO的 Steven說︰「 Beer Pong遊戲基本玩法係雙方喺自己前方擺放 10隻杯,遊戲目的係將乒乓波投入對方嘅杯中,被投中嗰方就要將杯啤酒飲晒佢,並將個杯移走,最後剩低最少杯嗰方就輸。 PONGConnect加入咗當個波投進隻杯時會有音效及燈光效果出現,而且計分電子化,仲同手機 app配合,記錄每次遊戲嘅成績,增加玩家嘅好勝心。」
PONGConnect變化自酒吧遊戲 Beer Pong,而 Steven創立公司也是由酒吧開始,「當時同朋友喺酒吧飲酒,一邊玩緊 Beer Pong,一邊吹水,講到個遊戲好耐歷史,飛鏢都變晒做電子鏢,佢都仲係冇變化。慢慢大家討論將 Beer Pong電子化嘅可能性,之後開咗個 WhatsApp group繼續傾,覺得係一個唔錯嘅商機,最後大家決定夾錢開公司,開發一個電子化嘅 Beer Pong。」

開酒吧做測試

15年, Steven與 5位 partner合資 4百萬,成立公司 Atalon Ventures,分別創立 PONGConnect及酒吧 Pong,「我哋喺觀塘租咗個 office用嚟做開發,研發前我哋都預想部機多數喺酒吧度用,開酒吧可以有地方用嚟做測試及收集數據,同時喺開發過程中,保持一定嘅收入。」
在澳洲修讀資訊科技的 Steven,先後做過 programming及 digital marketing,主要負責 PONGConnect的開發工作, Steven說開發過程用了約 8個月,「系統最重要係檢測到個乒乓波投入隻杯度,最初有用過紅外線,喺 office試用冇問題,但放喺酒吧測試,現場有好多唔同嘅光束,影響到個系統。之後用過感應重量變化嘅檢測裝置,但實際應用時張枱只要對正冷氣口,氣流又會影響到個系統。最後用類似八達通嘅設計,喺乒乓波及隻杯分別裝上識別器,當個波投入杯時可精準咁檢測到。」

用數據 sell客

最終 PONGConnect在 16年成功研發並推出市面, Steven說在香港做推廣最重要有數據支持,「我哋先喺酒吧 Pong擺咗 4部 PONGConnect嚟睇市場反應,見嚟嘅客人都好鍾意玩,我哋每局 game收費$160,每部每個月約有 15至 20萬嘅營業額,證明部機多人接受。我哋收集完數據後再向唔同酒吧做推廣,每部 PONGConnect遊戲枱嘅租金,每月係$4,500,大部分人聽完個數據後都會租用試吓。但另一個難題係運送部機時,有啲 lift唔夠位,我哋研發緊新一代嘅遊戲枱可以分拆開,送去現場再組裝,方便運送。」現時香港約有四十多間酒吧與 PONGConnect合作,租用他們的遊戲枱。
踏入 17年, Steven與拍檔計劃把 PONGConnect推廣到不同國家,「剛剛與世界最大型的 Beer Pong舉辦賽事團體 BPong傾成合作,佢哋嚟緊嘅比賽會採用我哋嘅遊戲枱及計分系統。另外,我哋同美國、日本、馬來西亞、新加坡等國家嘅酒吧傾緊合作,希望將 PONGConnect推廣到全世界。」

點入行?

開發 PONGConnect及手機 app需要相應的 programming知識, IT出身的 Steven現時年薪約 80萬,他認為入行做 IT需要捱得,「現時市場上有好多 IT業嘅人才,基本上都具有 programming方面嘅知識,所以喺請人時,會考慮其他個人嘅特質,好似要有學習態度,仲要有長時間工作嘅準備,我哋開發程式經常要 OT,唔係一個舒服嘅工作。」現時初入職 programmer月薪$13,000至$16,000。

撰文:曾志恒
攝影:劉宇軒
部分圖片由被訪者提供

Leave a Reply

Your email address will not be published. Required fields are marked *